பாடசாலை மொழி மேம்பாட்டுத் தர வட்டம் நிறுவுதல் தொடர்பில் விழிப்புணர்வூட்டும் நிகழ்ச்சித்திட்டம் இன்று (23) திருகோணமலை மாவட்ட அரசாங்க அதிபர் டபிள்யூ. ஜி. எம். ஹேமந்த குமார அவர்களின் தலைமையில் மாவட்ட செயலக பிரதான மாநாட்டு மண்டபத்தில் நடைபெற்றது.

அரச கரும மொழிகள் திணைக்களத்தால் ஏற்பாடு செய்யப்பட்டுள்ள இந்த விழிப்புணர்வூட்டும் நிகழ்ச்சித்திட்டம், சிங்கள மொழி பாடசாலைகளில் இரண்டாம் மொழியான தமிழையும், தமிழ் மொழி பாடசாலைகளில் இரண்டாம் மொழியான சிங்களத்தையும் அடிப்படையாகக் கொண்டு, பாடசாலைகளில் பல்வேறு செயற்றிட்டங்களை உருவாக்குவதை நோக்காகக் கொண்டுள்ளது.

இதன் ஒரு அங்கமாக, இன்றைய தினம் திருகோணமலை மற்றும் திருகோணமலை வடக்கு ஆகிய இரு கல்வி வலயங்களைச் சேர்ந்த சிங்கள மற்றும் தமிழ் மொழி மாணவர்களுக்கும், ஆசிரியர்களுக்கும் இந்த விழிப்புணர்வூட்டும் செயல்பாடு முன்னெடுக்கப்பட்டது.

இந்த நிகழ்வில், அரச கரும மொழிகள் ஆணைக் குழுவின் தலைவர் சட்டத்தரணி நிமல் ஆர். ரணவக்கையினால், பாடசாலைகளில் மொழி மேம்பாட்டு தரவட்டம் நிறுவுதலின் நோக்கத்தையும், அரச கரும மொழிக் கொள்கை தொடர்பிலும் விளக்கமளிக்கப்பட்டது.

மேலும், அரச கரும மொழிகள் திணைக்களத்தினால், பாடசாலை மாணவர்களுக்கும் ஆசிரியர்களுக்கும், இரண்டாம் மொழி சிங்களம் மற்றும் தமிழ் ஆகிய அகராதிகள் வழங்கி வைக்கப்பட்டன.

இந்த நிகழ்வில், அரச கரும மொழிகள் ஆணைக்குழுவின் மொழி மேம்பாட்டு மற்றும் விசாரணை அதிகாரி அமில நிரஞ்சலா, திருகோணமலை மற்றும் திருகோணமலை வடக்கு வலய கல்விப் பணிப்பாளர்கள், உதவி கல்விப் பணிப்பாளர்கள் உட்படப் பலரும் கலந்து கொண்டனர்.

பாடசாலை மட்டத்தில் மொழி மேம்பாட்டு தர வட்டங்களை அமைப்பதன் மூலம், நாட்டில் இனங்களுக்கிடையேயான புரிந்துணர்வையும், நல்லிணக்கத்தையும் கட்டியெழுப்புவதற்கு இந்த செயற்றிட்டம் வழிவகுக்கும் என எதிர்பார்க்கப்படுகிறது.